Search
Close this search box.
JAAR
KATEGORIE

Hermann Giliomee

Hermann Giliomee het Die Afrikaners: ’n Biografie – die storie van die Afrikaner se oorlewingstryd van die kolonisasietyd tot en met die een-en-twintigste eeu – eers in Engels geskryf as The Afrikaners – Biography of a people (2003). Dit het ‘n blitsverkoper geword en hy het dit self tot ‘n Afrikaanse weergawe verwerk wat groot lof ingeoes het. 
In 2008 was dit die eerste keer in die geskiedenis van die Helgaard Steyn-prys vir Letterkunde dat twee skrywers die prys en prysgeld (van R150 000) gedeel het. Albei die betrokke werke was toe al herhaaldelik in Suid-Afrika bekroon en het sedert 2004 ook wye internasionale erkenning ontvang.

Hermann Buhr Giliomee is op 4 April 1938 op Sterkstroom in die Oos-Kaap gebore. Hy het op Porterville skoolgegaan en Geskiedenis aan die Universiteit van Stellenbosch gestudeer. Daarna het hy by die Departement van Buitelandse Sake gewerk en lesings aan die Universiteit van Stellenbosch gegee. Van 1983 tot 1998 was hy professor in Politieke Studies aan die Universiteit van Kaapstad en van 1995 tot 1997 president van die Suid-Afrikaanse Instituut vir Rasseaangeleenthede. Hy is tans ’n buitengewone professor in Geskiedenis aan die Universiteit van Stellenbosch.

Giliomee was in 1984 die medestigter van Die Suid-Afrikaan, ’n Afrikaanse meningstydskrif. In die tagtigerjare was hy ook ’n gereelde rubriekskrywer vir die Rand Daily Mail en die Cape Times. Hy was ’n genoot by Yale Universiteit in die VSA (in die sewentigerjare), Cambridge Universiteit (1982 – 1983) en die Woodrow Wilson Center for International Scholars in Washington D.C. (1992 – 1993).

Hy is getroud met Annette van Coller. Hulle het twee dogters en vyf kleinkinders.

 

Bekronings

Stalsprys vir politieke wetenskap (2001)

Stalsprys vir geskiedwetenskappe (2004) – The Afrikaners

Recht Malan-prys vir nie-fiksie (2004) – The Afrikaners

Publikasies

NIE-FIKSIE

1975 Die Kaap tydens die eerste Britse bewind: 1795 – 1803

1979 Ethnic power mobilized – Can South Africa change?

1982 The Parting of the Ways: South African politics 1976 – 82

1985 Up against the fences (met Lawrence Schlemmer)

1988 The Shaping of South African Society, 1652 – 1840

1989 From apartheid to nation-building (met Lawrence Schlemmer)

1989 Negotiating South Africa’s future (met Lawrence Shlemmer)

1990 ’n Samelewing in wording: Suid-Afrika, 1652 – 1840

1994 The Bold experiment (met Lawrence Shlemmer en Sarita Hauptfleisch)

1999 The awkward embrace (met Charles Simkins)

2001 Kruispad

2003 The Afrikaners – Biography of a people

2004 Die Afrikaners: ’n Biografie

2006n Vaste plek vir Afrikaans (met Lawrence Schlemmer)

2007 Nog altyd hier gewees

2007 Nuwe geskiedenis van Suid-Afrika (met Bernard Mbenga)

2007 New History of South Africa (met Bernard Mbenga)

2012 Die laaste Afrikanerleiers, (Engels: The Last Afrikaner Leaders)